Најмалку 20 луѓе останаа заробени во урнатините откако силна експлозија уништи трикатна станбена зграда во населбата Маријахоев во Хаг.

Експлозијата се случила утринава во 6:15 часот, по што избувнал пожар и делови од зградата се урнале, а пет до седум станови биле целосно уништени, пишува „Ен-Ел Тајмс“ (NL Times).

Службите за спасување, вклучително и специјализирани тимови за урбано пребарување и спасување (УСАР), четири кучиња-водачи и градежни инженери присуствуваа на местото на настанот.

Досега најмалку четири лица се спасени и пренесени во блиските болници.

Експлозијата предизвика сериозна штета и на околните згради, а неколку улици во областа беа затворени од безбедносни причини.

Во тек е истрага за причините за експлозијата.