Вејп цигарите брзо стануваат глобален тренд кај младите, но новите истражувања потврдуваат дека тие не се безопасни. Лекари предупредуваат дека употребата може да доведе до сериозни кардиоваскуларни и белодробни оштетувања, па дури и да го зголеми ризикот од мозочен удар за над 30 проценти.

Според професорката Маја-Лиса Лохен од Универзитетската болница во Северна Норвешка, „вејпингот создава нова генерација зависници од никотин“ и често е првиот чекор кон пушење традиционални цигари. Особено ранливи се децата и тинејџерите, кај кои никотинот може трајно да влијае на развојот на мозокот, пишува Еуроњуз.

Иако се рекламираат како „побезбедна алтернатива“, студиите покажуваат дека е-цигарите ослободуваат штетни хемикалии и предизвикуваат стрес врз срцето и крвните садови. Светската здравствена организација предупредува дека тие не се ефикасна алатка за откажување од пушење и бара построги регулативи.

Експертите апелираат за образовни кампањи, забрани и вклучување на училиштата и родителите во превенцијата, со порака дека „вејпингот не е мода, туку сериозна закана по здравјето“.