Северна Македонија, Србија и Албанија се лидери во регионот во воспоставување нови економски односи на Западен Балкан. Дека тоа е така говори и претстојниот „Економски форум за регионална соработка“ што деновиве ќе се одржи во Скопје, а на кои ќе се присуствуваат македоснкиот и албанскиот премиер Зоран Заев и Еди Рама како и српскиот претседател Александар Вучиќ кои се иницијаторите на иницијативата досега позната како „мал шенген“. Претходниците на кабинетите на високите гости се веќе присутни во Скопје и помагаат во организацијата на овој значаен настан.
Како што е веќе објавено, свое учество на собирот досега пријавиле вкупно околу 300 компании, од кои 175 од Србија, 79 од Северна Македонија, 28 од Албанија, девет од БиХ, како и фирми од Австрија, Тајван, Полска и Грција, но и претставници од меѓународните институции кои пројавија голем интерес за овој форум. На настанот ќе биде објавено и новото име на регионалната иницијатива која досега беше неформално нарекувана како “мал шенген”.
Како што за Слободен печат велат од Владата, на форумот ќе се потпишат два меморандума за разбирање и еден меѓудржавен договор кој во огромна мера ќе го олесни животот на граѓаните од Западен Балкан и на бизнис заедницата.

Меморандумот за разбирање за олеснување на увозот и извозот и движење на стоки во Западен Балкан и Договорот за соработка за заштита и спасување од катастрофи произлегуваат од иницијативата за напредна регионална економска соработка меѓу Република Северна Македонија, Република Србија и Република Албанија.

Во содржинска смисла, Меморандумот содржи одредби за поедноставување на формалностите поврзани со увозот и извозот и движење/транзит на стоки, соработката на царинските и другите надлежни органи, како и посебни одредби за безбедноста на храната, ветеринарни и фитосанитарни прашања и слободното движење на индустриски непрехрамбени производи.

Со Договорот за соработка за заштита и спасување од катастрофи, договорните страни ја регулираат рамката на условите за доброволно давање на помош во случај на катастрофи, едукација и обука на персоналот на службите, единиците за заштита и спасување и друите членови на спасувачките тимови, размена на научни и технички податоци.

Третиот меморандум е особено значаен за движењето на пазарот на трудот во регионот и со него договорните страни ја изразуваат својата волја да го олеснат движењето на луѓето за да обезбедат полесен и послободен пристап до пазарот на трудот, што значи отстранување на работни дозволи и поедноставување на постапките за добивање дозвола за привремен престој.

Ова е потврда на заложбата за спроведување на правото на ЕУ во областа на слободно движење на работниците и подготвување за поблиска интеграција на единствениот пазар на ЕУ.

Лидерите се во постојана комуникација и развиваат идеи, концепти и планови за нови трилатерални економски иницијативи и инвестиции кои ќе значат нови вработувања, директни бенефиции за народите и нови олеснувања на протокот на луѓе, стоки и услуги.