Прелиминарните проценки на Европскиот завод за статистика објавени денеска укажуваат на најголем пад на активностите во Економијата на Европската унија и еврозоната во изминатите 25 години.

На ниво на Европската унија, економијата бележи намалување од 3,5 проценти во однос на претходниот квартал, кога активноста се зголемила за 0,2 проценти.

Економијата во еврозоната опадна за 3,8 проценти во однос на претходниот квартал кога порасна за 0,1 проценти.

Во двете области, падот на БДП е најголем од 1995 година, посочува Евростат.

На годишна основа, сезонскиот приспособен БДП на ЕУ падна 2,7 отсто во првите три месеци од оваа година, најмногу од глобалната финансиска криза во 2009 година. Во последните три месеци од минатата година, тој порасна за 1,3 проценти.

БДП на еврозоната падна 3,3 проценти во првите три месеци од оваа година во однос на истиот период лани, исто така најсилен од третиот квартал на 2009 година.