Општина Центар и „Нула отпад“ со повеќе активности под мотото „Пренеси ја пораката, одиме во лов на електронски отпад “ ќе ја подига свеста кај најмладите за правилно селектирање на е-отпадот и заштита на животната средина. За таа цел во сите општински основни училишта се поставени контејнери за ситен електронски отпад и отпадни батерии, а до 14 октомври се предвидени работилници наменети за едукација на децата за собирање и селектирање на овој вид отпад.

На работилниците во училиштето „Киро Глигоров“ наменети за второоделенците денеска присуствуваше и градоначалникот на Општина Центар, Горан Герасимовски.

Децата од мали нозе стекнуваат навики за правилно постапување со електронскиот и други видови отпад. Тие брзо учат како да собираат и селектираат и во тој поглед се посовесни и поодговорни од возрасните. Јас, како градоначалник, давам целосна поддршка на вакви акции што придонесуваат кон заштита на нашето здравје и околината – рече Герасимовски.

Од Општината информираат дека на граѓаните им е достапна и услугата за селекција и рециклирање на овој вид на отпад. Тие на еко-линијата 070 236 000 секој ден можат да пријават и погабаритен стар електричен или електронски отпад од своите домови и компании, кои ќе биде бесплатно преземен и правилно третиран без да биде закана по здравјето на луѓето и квалитетот на животната средина.