Жителите на липковско Слупчане денеска повторно не им дозволиле на екипите на ЕВН да работат на мрежата, со барање да им се простат досегашните долгови, кои, според податоците на ЕВН, изнесуваат неколку илјади евра. На терен била присутна и полицијата.

ЕВН до медиумите ги испрати сите барања на жителите од Слупчане, кои покрај простување на долговите, бараат и бесплатни нови приклучоци, без разлика колку ќе потрошат во иднина да не им се фактурира повеќе од 3.000 денари, верските објекти да бидат ослободени од плаќање и слични други барања. Овие барања, од ЕВН велат дека се спротивни на законските регулативи.

Пред околу три недели мештаните ветија дека ќе им дозволат на екипите на ЕВН да работат. На средба со нив беа министерот за економија, Крешник Бектеши и градоначалникот на Липково, Еркан Арифи. Загубите во Слупчане се 80 проценти а наплатата е 20 отсто, велат од ЕВН.

На почетокот на минатиот месец мештаните од селото го блокираа патот на екипите на ЕВН и не им дозволија да влезат во селото.

Од ЕВН тогаш соопштија дека со ваквиот обид на самоволно противправно приклучување, предизвикан е дефект од големи размери кој ги оставил и соседните села без струја.