Директорката на кичевската болница доктор Маја Цветановска Трајкоска за „Слободен печат“ вели дека во моментов ехо-апаратот за кој вчера во медиумите се пишуваше дека „е украден од поранешниот директор“ – е во болницата и таму бил вратен уште на 23 октомври. Извори од болницата ни испратија фотографија од „враќањето на апаратот“.

Цветновска Трајкоска вели дека кога ја презела функцијата директорка на болницата во август годинава ехо апаратот не бил во болницата, ама подоцна, откако било пријавено во МВР – тој бил вратен во гаражите на болницата. Околу гаражите, тврди таа, има камери и ќе се види кој го вратил.

-Беше вратен во гаражите, во црни ќеси, отворена беше кутијата ама некористен беше. Имаше порака оставено „ќе те уништиме“. Потоа апаратот го зема крим-техника на МВР и вчера ни го вратија од крим-техника, тој е сега во посебна просторија и чекаме обука за да може да работиме со него, рече директорката за „Слободен печат“.

Поранешниот директор на кичевската болница доктор Станко Трпески за „Слободен печат“ утринава изјави дека е шокантно и погубно за неговата репутација на вести да гледа лаги, дека „полицијата му го нашла украдениот ехо-апарат“ дома.

Нему МВР му поднесе кривична пријава дека „додека бил директор неовластено присвоил дониран ехо-апарат од болницата“, но апаратот во соопштението на МВР не беше наведено дека е вратен, дека бил на крим-вештачење и дека во моментов е во болницата.

Трпески за „Слободен печат“ вели дека апаратот никогаш според неговите сознанија – не ја напуштил болницата во Кичево.

-Тој апарат е голем колку врата, а во целата болница има камери. На ехо-апаратот има баркод и во која било здравствена установа да завршел – би бил најден. Ниту сум го зел, ниту ми е потребен – изјави доктор Трпески за „Слободен печат“.

Тој ова го смета за политички исценирана хајка, која има за цел да му ја наруши репутацијата.

-Не ми е филозофијата да расипам нешто, туку да направам нешто. И тоа не му одеше во прилог на некого. Во времето на моето директорување е набавен прв лапароскоп, првото ехо на гинекологија. Конкретниот ехо-апарат за кој ме гонат, во мое време си беше во магацин. Не беше ни отворен, тоа е пакет голем како фрижидер. Не знам дали излегол од болницата, ама според моите сознанија ехо-апаратот никогаш не ја напуштил болницата туку е цело време наоѓан, од еден во друг, во трет магацин. Ова е крими филм, што се обидуваат да ми го направат, вели тој.

Запрашан зошто апаратот не бил во употреба, тој вели дека двајцата доктори што требало да го користат, биле во Скопје на едукација односно на специјализација и супспецијализација и затоа апаратот не се користел во времето на ковид пандемијата, а и дополнително – во времето на ковид сите други редовни програми биле во мирување.

-Од технички причини апаратот не беше ставен во употреба. Со овој ехо-апарат се прави ехо томографија на срце и на штитната жлезда. Двајцата доктори што требаше да го користат беа на специјализација и затоа не беше ставен во функција. На датумот кој се наведува во соопштението на МВР, јас сум бил на конгрес во Солун, сум користел одмор. Не е во моја надлежност да го чувам тој апарат откако сум ја предал функцијата. Според моите сознанија, од „рекла-кажала“ што ги слушам низ болницата, апаратот бил прво во еден магацин, па во втор, па во трет. Па кога се вратив од пат го нашле на четврто место. Годинава на 7 август јас направив примопредавање во болницата на нов директор и заминав на одмор и на конгрес во Солун. Додека бев на конгрес ми се јавија дека им се расипало ехото. Јас им реков, имате уште два ехо-апарати во болницата. Епа ги нема велат. После дознав дека го нашле, кога се вратив од Солун, вели Трпески.

Инаку, МВР во краток билтен само информираше дека Трпески има кривична пријава зашто „од 08.07.2021 до 07.08.2024, во својство на директор на ЈЗУ Општа болница – Кичево, со намера да се стекне со противправна имотна корист, неовластено присвоил ехо апарат M9 Mindray, кој му бил доверен во службата, како донација од Министерство за труд и социјална политика во вредност од 2.134.482 денари“.

„Слободен печат“ од свои извори во МВР дознава дека кривичната пријава за Трпески е поднесена затоа што кога се извршило примопредавање на функцијата наводно од негова страна на следниот директор (тоа се случило летото 2024), тогаш ехо апаратот не бил примопредаден и го немало во материјалната евиденција.