Со петтиот антикризен пакет на мерки за поддршка на плати за февруари и за март во 2021 година се обезбедени 1,92 милијарди денари. Со оваа прва мерка ќе бидат опфатени околу 60.000 работници месечно, а реализацијата на поддршката е замислена да биде скалеста во износ од 14.500 денари до 21.776 денари.

Како истакна премиерот Зоран Заев, образложувајќи го детално петтиот сет, оваа мерка е опциска, односно компаниите ќе може да ја користат или неа или втората мерка за кредити со нула проценти камата во дејностите туризам, занаетчиство, угостителство, индустрија за организирање настани, транспорт, приватни здравствени установи.

– За втората мерка се проектирани 615 милиони денари или 10 милиони евра и за неа може да се аплицира во 2021 година. Средствата ќе се реализираат преку Развојната банка, истакна премиерот кој на прес-конференција во Владата ги објасни поединечно сите мерки од петтиот пакет.