На вчерашната седница на Советот на Општина Гази Баба донесе Одлука за начинот на применување на ДУП-овите во просторот на Градска четврт ССИ 09, поточно во населбата Автокоманда. Според оваа одлука се прекинуваат сите постапки доставени преку системот е-дозволи за подготвителни работи и издавање решенија за градба.

Како што информира градоначалникот Бобан Стефковски оваа одлука се однесува на територијата опфатена со деталните урбанистички планови за оваа четврт и ќе важи една година од денот на нејзиното донесување. Притоа, одлуката не се однесува на барањата за реконструкција или адаптација.

За нечии зелени бавчи и дворови, пола Скопје секојдневно со часови е без вода

Градоначалникот вели дека во Автокоманда во изминатиот период била дозволена изградба на нови објекти и надградба на постојни станбени згради согласно со важечките Детални урбанистички планови, а со тоа значително се зголемил бројот на жители, како и притисокот врз водоводната мрежа, јавниот паркинг и квалитетот на живот во населбата.

Ова е чекор кон хумана урбанизација и подобар животен стандард за жителите. Последиците од неодговорното урбанистичко работење во минатото ги чувствуваме денес. Затоа мораме да донесуваме храбри и одговорни одлуки – во интерес на граѓаните и одржлив развој на нашата општина.  Апелирам и барам, Град Скопје и ЈП „Водовод и канализација“ итно да преземат мерки во насока со надминување на проблемот со недостатокот на вода во урбаниот дел од општината и тоа во Автокоманда, Железара, Маџари, Ченто и Хиподром, вели Стефковски.