Вечерва судијата на претходна постапка при Основен кривичен суд Скопје го прифати предлогот на обвинителството и на осомничените за држење шестмина мигранти во заложништво во подрум во Студеничани им определи мерка притвор во траење од 30 дена, соопшти Обвинителството.

„Притоа судијата го имаше предвид образложението на јавниот обвинител во врска со предлогот за определување на мерка притвор, особено фактот што против првоосомничениот веќе се води постапка во ОЈО ГОКК за сторено кривично дело Криумчарење на мигранти за кое му била определена мерка притвор, која Кривичниот совет решавајќи по жалба на одбраната, прифатил гаранција од 185.382 евра во земјоделско земјиште и ја преиначил мерката притвор, определувајќи му мерки на претпазливост“, велат од Обвинителството.

Апелациониот суд, решавајќи по жалба на ОЈО ГОКК, ја отфрлил и ја потврдил одлуката на Кривичниот совет, по што тој го повторил делото, сторувајќи дополнително уште едно кривично дело, додаваат од ОЈО.

Шестмина мигранти-тинејџери од арапска земја која Обвинителството не ја открива, од кои петмина биле малолетни, вчера беа спасени од заложништво во подрум од куќа во скопското село Студеничани, откако успеале да испратат порака до ОЈО со локацијата на која се наоѓале. Според досегашните информации од полицијата и Обвинителството, уапсени се шестмина – двајца татковци и четворица нивни синови, кои се осомничени дека членувале во криминална група која криумчарела и уценувала мигранти. Тие, според Обвинителството, барале 5.000 евра од роднини на момчињата, за да ги ослободат.

Драма во Студеничани: Криминалци насила држеле мигранти во подрум, ги ослободила полицијата