Скопската „Пасворд Продукција“ во рамки на програмата на фестивалот „Таксират“ го организира концертот на култната словенечка група „Лајбах“ во салата на Македонската филхармонија.

Глобално најпровокативниот музички состав и уметнички колектив со авангардна музика и револуционерни настапи „Лајбах“ („Laibach“), на 4 март 2025, во рамки на #Таксират, во живо ќе ја претстави својата нова концертна програма базирана на култниот албум „Опус Деи“ („Opus Dei“), првиот ремастериран албум на групата.

Групата „Лајбах“ успеа да го трансформира пејзажот на современата музика со комбинирање на политичкиот дискурс со уметноста и музиката. Оригинално, албумот „Опус Деи“ е објавен во 1987 година како прв за издавачката куќа „Mute“, миксиран од Рико Конинг („Wire“, Pere Ubu, „Swans“, William Orbit) и е албум со кој „Лајбах“ стана еден од меѓународно најпризнатите бендови кои се појавиле од поранешните комунистички земји во источна и централна Европа.

Концертот во Скопје е дел од светската турнеја на „Opus Dei Revisited“, но покрај материјалот од „Опус Деи“, „Лајбах“ ќе изведе и селекција од своите класици и одбрани песни од деценискиот опус, вклучувајќи ги и објавените пред „Опус Деи“, известија од „Пасворд Продукција“.