Еден од денеска приземјените астронаути во САД бил задржан во болница набргу по враќањето од продолжената мисија на Меѓународната вселенска станица. Астронаутот, кој НАСА не го именуваше од причини за приватност, боледува од непознат медицински проблем.

НАСА првично соопшти дека целиот екипаж бил пренесен во болницата „Ascension Sacred Heart Pensacola“ од претпазливост, но не прецизираше дали целиот или дел од екипажот имал проблеми.

Останатите тројца членови на екипажот ја напуштија болницата и се вратија во Хјустон, соопшти вселенската агенција.

„Еден астронаут кој останува во болницата е во стабилна состојба, под набљудување како мерка на претпазливост“, соопшти НАСА.

Астронаутите Метју Доминик, Мајкл Барат и Жанет Епс и рускиот космонаут Александар Гребенкин се приземјија во вселенското летало на „Спејсекс“, „Кру дрегон“ во петокот во близина на Заливот на Флорида. Тие мораа да останат на мисијата два месеца подолго поради безбедносни стравувања околу новата капсула на „Боинг“, „Старлајнер“.

НАСА, која вообичаено е строга по медицинските прашања поврзани со астронаутите, одби да соопшти што го поттикнало зголеменото ниво на претпазливост или да ја опише здравствената состојбата на членовите на целиот екипаж.