Легендарната актерка Анџелика Хјустон откри дека пред шест години ѝ бил дијагностициран рак и дека ја добила битката со тешката болест.

Хјустон не сакаше да открие со каков вид рак се бори, но рече дека болеста ѝ била дијагностицирана по објавувањето на филмот „Џон Вик: Поглавје 3 – Парабелум“, во кој имаше улога.

„Тоа беше многу сериозен момент за мене. Успеав да го преживеам и сум горда на себе. Не е нешто што дојде лесно. Ме шокираше, но исто така ме направи свесна за тоа што не треба да правам, места каде што не треба да одам. Едно од тие места е премногу сериозно сфаќање на животот. Па сега, кога имам шанса, се смеам и се обидувам да не претерувам“, изјавила таа за „Пипл“.

Актерката откри дека сè уште оди на редовни прегледи, но дека е без рак веќе шест месеци.

„Многу ми значи. Тоа е фантастична работа. Многу сум горда на себе и имав среќа. Моите лекари беа прекрасни“, додалa таа.

Хјустон, која е најпозната по улогата во филмот „Семејството Адамс“, исто така рече дека одлучила јавно да проговори за својата борба со надеж дека тоа ќе им помогне на другите.