Актерката Рене Зелвегер откри дека поради една незгода што ѝ се случила, морала да копа по ѓубре. Таа призна дека со текот на годините усвоила некои од најпрепознатливите особини на својот лик, Бриџит Џонс.

Зелвегер се присети на незгодата што ѝ се случила за време на доделувањето на Златните глобуси во 2001 година. Кога Хју Грант ја прогласил за добитничка на награда за улогата во филмот „Медицинската сестра Бети“ („Nurse Betty“), таа не била во публиката. Водителката на интервјуто ја праша дали во тој момент го бришела карминот од усните, а Зелвегер низ смеа одговори дека причината била сосема поинаква.

Актерката објасни дека во тој момент се обидувала да го најде својот кармин во кантата за ѓубре.

„Ги знаете оние мали чантички што ги носите кога излегувате? Немаат многу простор, па мора внимателно да одберете што ќе ставите во нив. Се обидов да ја затворам, но не успеав. Тоа е како да играте ‘Тетрис’ – сè мора да биде на свое место. Морав нешто да жртвувам, па го извадив карминот и го фрлив во ѓубре. Подоцна сфатив дека можеби ќе ми треба, па морав да копам за да го најдам. Токму во тој момент некој почна да ми го вика името додека јас копав по ѓубрето“, раскажа Зелвегер низ смеа.

Филмската трилогија за Бриџит Џонс започна во 2001 година со „Дневникот на Бриџит Џонс“ („Bridget Jones’s Diary“), базиран на истоимениот роман на Хелен Филдинг. Филмот стана огромен хит благодарение на шармот на главната хероина, духовитото сценарио и љубовниот триаголник со ликовите што ги толкуваа Хју Грант и Колин Ферт.

Вториот дел, „Бриџит Џонс: на работ од разумот“ („Bridget Jones: The Edge Of Reason“) (2004) ја продолжи приказната, а иако не достигна култен статус како првиот филм, беше комерцијално успешен. Третиот дел, „Бебето на Бриџит Џонс“ („Bridget Jones’s Baby“) (2016), беше пречекан со носталгија и позитивни реакции, носејќи нова приказна во која Бриџит во доцните четириесетти се обидува да открие кој е таткото на нејзиното дете.

Во новото продолжение, „Бриџит Џонс: луда по него“ („Bridget Jones: Mad About the Boy“), Бриџит е педесетгодишна мајка на две деца која поминува низ загуба и животни промени. Но, и покрај сите предизвици, таа останува верна на себе – и токму тоа ја прави посебна.