За Стивен Греам се зборува сè повеќе благодарение на неговата улога во новата хит драма на Нетфликс „Адолесценција“.

Но, патувањето до славата на Греам можело да заврши кога имал само 20 години, откако се обидел да се самоубие поради тешка депресија. Сето тоа се случило поради осаменост. Во 2019 година, во гостувањето на Би-би-си радио 4, тој откри дека е благодарен што неговиот обид за самоубиство не успеал, додавајќи дека му се чинело дека ја слуша неговата покојна баба како му вика во моментот на обидот.

– Таа викаше „Стивен“ и јас помислив дека заминав… Само се освестив и ги отворив очите“, рече тој.

51-годишниот Греам призна дека се обидел да ги скрие знаците на неговите психички проблеми од родителите, но на крајот им кажал сè и признал дека не знае како да се справи со сите тие проблеми.

Откри дека тоа било делумно предизвикано од чувството на изолација по преселувањето во Лондон. Тоа, во комбинација со часовите по глума кои го поттикнувале да се потпира на интензивна лична траума за да додаде автентичност на неговите улоги, довело до форма на „индуцирана психоза“.

„Мојот помал брат само што се роди. Моите родители изгубиле дете (при раѓањето) три години претходно. Баба ми почина кога имав 14 години“, изјави тој за „Сандеј тајмс“ во 2019 година.

„Бев во голем свет и не ми беше лесно. Бев многу близок со мајка ми и со татко ми. Доживеав слом поради сите тие трауматични моменти во моите доцни тинејџерски години“.

По обидот за самоубиство, тој се вратил дома кај неговите родители. Рече дека никогаш нема да го заборави моментот кога им кажал за своите проблеми.

„Моите родители се обидуваа да сфатат што ми се случува. Никогаш нема да ги заборавам нивните солзи.“

Потоа тој започнал врска со неговата сегашна сопруга Хана Волтерс, со која се оженил во 2008 година.

„Таа знаеше што се случи. Секогаш беше во близок контакт со мајка ми“, рече Греам.

Греам додаде дека неговата сопствена борба му помогнала да ги цени чувствата со кои се борат многу луѓе.

„Ја познавам осаменоста, изолацијата и чувството дека не можете да се справите со работите“, рече тој. Тој, исто така, откри како предизвикувачките улоги го истоштиле.

Призна дека се „изгубил себеси“ кога го играл расистичкиот скинхед Комб во филмот „Ова е Англија“. Се свртел кон алкохолот за да се справи со притисокот од улогата, а кога се враќал дома плачел по снимањето на интензивните сцени.

Според Светската здравствена организација (СЗО), околу 3,8% од светската популација има депресија, вклучувајќи 5% од возрасните (4% меѓу мажите и 6% меѓу жените) и 5,7% од возрасни постари од 60 години. Секоја година повеќе од 700.000 луѓе умираат поради самоубиство, што е четврта водечка причина за смрт кај луѓето на возраст од 15 до 29 години.