Државниот санитарен и здравствен инспекторат (ДЗСИ) утврди пропуст во лекувањето на седуммесечното бебе кое минатата недела почина на Детската клиника. Во извештајот на ДСЗИ се вели дека било констатирано дека за време на прегледот на бебето во дежурната амбуланта немало специјалист.

„При надзорот е констатирано дека на клиниката сè уште не е решен проблемот со задолжително присуство на специјалист во дежурната амбуланта, а за кое во ДСЗИ се води прекршочна постапка. И понатаму медицинската докуметација се креира и од страна на доктори кое не се присутни на работа или во дежурната амбуланта, за што од страна на ДСЗИ е веќе издадено решение чии рокови течат“, се вели во извештајот на ДСЗИ.

Според инспекторатот, Законот за здравствена заштита предвидува дека за прием на пациенти прегледани на Клиниката како итни случаи, доколку прием не е извршен установата е должна да издаде писмено образложение за причините за одбивањето за болничко лекување, што не било постапено во случајот со починатото седуммесечно бебе.

„ДСЗИ на ден 17 и 18 декември 2024 година изврши вонреден инспекциски надзор во врска со починатото седуммесечно бебе на ЈЗУ УК за детски болести – Скопје и врз основа на извршениот увид во медицинска документација – истории на болест, упати и специјалистички извештаи и изјавите од докторите кои учествувале во лекувањето, констатира дека седуммесечното бебе првпат во ЈЗУ УК за детски болести – Скопје било донесено на ден 9 декември 2024 година заради висока температура и осип по целото тело од пред една недела. Првично, детето е прегледано од страна на специјализанти, во консултација со доктор специјалист и упатено е на дополнителни испитувања на Инфективната клиника, Клиниката за дерматовенерологија и во биохемиската лабораторија при Детската клиника. По добиените резултати и препишаната терапија, испратено е на домашно лекување со насока за контрола кај матичен лекар и по потреба на Детската клиника“, појаснуваат од ДСЗИ.

На 11 декември, во вечерните часови, детето повторно било донесено на Клиниката и заради влошената клиничка слика, хоспитализирано е на Одделот за неврологија. Креирани му се упати за повеќе испитувања, а на 13 декември заради натамошно влошување на здравствената состојба, трансферирано на Одделот за интензивна нега и терапија.

„По стабилизирање на состојбата, повторно е вратено на Одделот за неврологија, каде престојувало неколку часа, по што повторно е вратено на ОИНТ, каде се направени дополнителни радиолошки, ехографски и други лабораториски испитувања, што укажуваат на тешка општа состојба на детето, што во вечерните часови на ден 15 декември 2024 година, завршува со егзитус“, додаваат од Инспекторатот.

ДЗСИ ќе бара од министерот за здравство да формира посебна комисија која ќе изврши и стручен надзор врз начинот на којшто било лекувано бебето.

Откако во јавноста излезе веста за смртта на бебето, директорот на Детската клиника, Реџеп Мемеди рече дека биле запазени сите процедури и третмани и нема лекарска грешка. Тој рече дека се работи за „неоснован притисок врз Клиниката и здравствениот персонал“ во оваа институција.