На второто издание на настанот „Get EXITed“ во Градскиот парк во Струмица на 7 септември пристигнуваат возбудливи светски и регионални имиња!

На овој Егзитов спектакл, кој минатата година го посетија повеќе од 20.000 луѓе, ќе настапи мега-ѕвезда – продуцентот, пејач, текстописец и диџеј Џон Њуман, кој со години суверено ја носи титулата поп и соул ѕвезда!

Во Струмица пристигнува и творецот на најголемите светски хитови Бурак Јетер, кој на овогодишниот „ЕГЗИТ“ фестивал со спектакуларен настап до утро ги држеше разиграни десетиците илјади фанови пред Главната бина Горки Лист.

Тие ѝ се придружуваат на неповторливата Констракта, а уште имиња ќе бидат објавени набргу.

Струмичкиот „Get EXITed“ го организира тимот на „ЕГЗИТ“ во соработка со Општина Струмица, влезот на овој голем настан е слободен.

Џон Њуман

– Од првиот „ЕГЗИТ“, гостите од Северна Македонија беа меѓу најбројните и особено задоволство ни е уште еднаш да ја донесеме моќната енергија на „ЕГЗИТ фестивалот“ во Струмица. Минатогодишното издание навистина ги надмина сите очекувања, за време на настанот немаше слободно сместување во околината на Струмица, туристите дојдоа од целиот регион, а на 7 септември со најголемите глобални и регионални имиња продолжуваме во уште посилен ритам – најавува основачот и директор на „ЕГЗИТ фестивал“ Душан Ковачевиќ.

Џон Њуман, суверена поп/соул ѕвезда со повеќе од 2,5 милијарди стримови и дури девет одлични песни што беа број 1 на светските топ-листи, во Струмица го носи својот специјален хибриден настап, во чии рамки ќе ги изведе своите најголеми хитови. Зад себе има соработки со лидерите на музичкиот свет, меѓу кои се Дејвид Гета, Калвин Харис, Алесо, Рудиментал, Сигала, Најл Роџерс, Галантис и Кајго. Тој оствари настапи што ја редефинираат кариерата, како што беше затворањето на фестивалот „Коачела“ со Калвин Харис, и приреди спектакуларни лајв изведби на настаните од светска класа, меѓу кои се „ЕГЗИТ“ и „Гластонбери“. Само што ја објави песната „Call Your Name“ со Алесо, на која предодредено ѝ е да стане глобален хит и која е прогласена за песна на неверојатниот „Тумороуленд“ фестивал! Њуман зад себе ги има песните што ги знае цел свет, како „Blame“ (feat. Calvin Harris), „Love Me Again“, „If You Really Love Me“ (feat. David Guetta), „Feel The Love“ и „Not Giving In“ (feat. Rudimental), „Cheating“ и многу други.

Бурак Јетер

Со своите исклучителни хитови, програмата ќе ја засили и Бурак Јетер, турски продуцент, хитмејкер и диџеј со речиси милијарда стримови само на Јутјуб. Во изминатава деценија песните „Crash“, „Friday Night“, „Happy“, „Oh My My“ ја освојуваат планетата, радискиот етер и фестивалските сцени, додека „Tuesday“ заработи платинеста плакета во повеќе земји, а го создаде и многу забележителниот ремикс за прекрасната песна „My Life Is Going On“. Настапи на овогодишниот „ЕГЗИТ фестивал“ на главната бина „Горки лист“ и во таа пригода уште еднаш го потврди својот статус на мега-ѕвезда, која создава атмосфера и енергија за илјадници и илјадници луѓе.

Констракта

Констракта беше првото најавено име на ова ново издание на настанот „Get EXITed“. Една од најисклучителните музичарки од овие простори и пошироко, го освои целиот свет со песната „In Corpore Sano“, што фрли заслужено светло на нејзината генијалност. На оние што претходно не ја следеле нејзината самостојна работа им донесе целосно освежување и автентичност, но и изненаденост. „In corpore sano“ е дел од проектот „Triptih“, во кој се и песните „Nobl“ и „Mekano“, а авторка на сите текстови е Констракта. Следуваше уште еден триптих – „Evo, obećavam“, кој ја потврди посебноста на Констракта и на нејзиниот тим, како и високите визуелни и музички стандарди што ги поставија, со испраќање силни и освестувачки општествени пораки.