Ретка прилика да се слушне џез-групата „Некст ту сајленс“ (Next to Silence) во живо ќе биде концертот што ќе се одржи на 27 февруари (четврток), со почеток во 21 часот, во клубот „Котур“ во Скопје, каде ќе бидат изведени повеќе композиции од нивните албуми.

„Некст ту сајленс“ е македонски џез-состав кој функционира повеќе години и сочинет е од членови кои долго соработуваат со разни музички формации. Групата фаворизира специфичен џез-израз кој не се вклопува во конкретни категории и истовремено интерактира со духовни и саркастични елементи.

Поради својата посветеност да изгради сопствен звук, бендот има привилегија да ја издава својата авторска музика за престижната етикета на Скопскиот џез фестивал, што овозможува врвна афирмација на нивната звуковна уметност.

Во таа насока излегува и нивниот последен албум за „СЏФ Рекордс“, именуван како „Рух“, а кој е мошне добро прифатен меѓу слушателите, и особено меѓу музичката критика која направи неколку осврти на ова комплексно музичко дело. Нивната умешност, сублимирана и во ова најново издание, не ретко е манифестирана и на нивните бројни настапи, што воедно ќе биде можност да се посведочи и на концертот во „Котур“. На својот настап, освен материјалот од „Рух“, групата во репертоарот ќе вклучи композиции и од нивниот претходен албум „…“.

Составот „Некст ту сајленс“ го сочинуваат: Кирил Кузманов (саксофон), Ади Имери (гитара), Филип Димишковски (клавијатури), Драган Стојковски (бас гитара) и Гоце Наумов (барабани).