Основачот на „Амазон“, Џеф Безос, и поранешната новинарка Лорен Санчез наводно ќе се венчаат следната недела на она што се очекува да биде раскошна и контроверзна церемонија организирана во Венеција, Италија, за која наводно ќе бидат потрошени милиони долари и која претежно ќе се чува во тајност, пишува „Форбс“.

Прославата ќе се одржува во Италија, ќе трае од 24 до 26 јуни, а многумина веќе ја нарекуваат „свадба на годината“.

Се проценува дека Безос потрошил повеќе од 36 милиони долари за овој луксуз. Тие ќе се венчаат на островот Изола ди Сан Џорџо, каде резервирале пет луксузни хотели: „Сент Реџис“, „Грити Палас“, „Даниели“, „Чипријани“ и „Аман Венеција“.

Забави се планирани и на јахтата на Безос вредна околу 500 милиони долари, која ќе се закотви во венецијанското пристаниште. На нивната свадба ќе присуствуваат многу познати имиња, меѓу кои Ким Кардашијан, Леонардо Дикаприо, Опра Винфри, Ева Лонгорија, Орландо Блум и други.

Властите во Венеција изјавија дека списокот на гости за свадбата на Безос и Санчез е ограничен на 200 луѓе. Не е сигурно кој ќе присуствува на свадбата, но „TMZ“ објави дека неколку познати личности добиле покани, вклучувајќи ги Ева Лонгорија, Кејти Пери и Орландо Блум, Опра Винфри, Гејл Кинг, Крис Џенер, Ким Кардашијан и Џуел Килчер, истакнувајќи дека Иванка Трамп и Џаред Кушнер, покрај Карли Клос и сопругот Џошуа Кушнер, исто така се нашле на списокот.

Некои локални жители на Венеција, која со години се справува со прекумерен туризам што ја оптоварува градската инфраструктура и услуги, ќе протестираат против свадбата поради загриженост дека нејзиниот обем ќе ги влоши некои од проблемите создадени од прекумерните туристички толпи. Активистите организираа кампања „Нема простор за Безос“ против свадбата, објавувајќи транспаренти и налепници низ целиот град.