Претседателот на Собранието на Северна Македонија, Талат Џафери, денеска во неговиот Кабинет ја прими на проштална средба амбасадорката на САД во Северна Македонија, Кејт Брнз.

Како што соопшти собраниската прес-служба, Џафери ѝ се заблагодарил на амбасадорката Брнз за „нејзината значајна улога во унапредувањето на политичките процеси во земјата, како и за силната поддршка на процесот на интеграција во НАТО и ЕУ во текот на нејзиниот мандат“, истакнувајќи дека Република Северна Македонија и САД негуваат извонредни билатерални односи.

Амбасадорката Брнз рекла дека во текот на нејзиното извршување на функцијата биле донесени неколку клучни одлуки во земјата и се случи и историскиот настан – членството во НАТО.

Таа изразила задоволство од можноста да биде дел од прогресот на земјата во целина и на Собранието. Притоа, „го оценила како мошне успешно водството на Собранието од страна на претседателот Џафери и неговите напори да го подигне значењето на Собранието како законодавна власт и да ја зацврсти неговата независност“. Брнз рекла и дека „сите се импресионирани од постигнувањата на Република Северна Македонија и нејзините перформанси како членка во НАТО“, стои во соопштението.

На средбата, претседателот Џафери и врачил на амбасадорката Брнз признание за нејзиниот целокупен придонес и и посакал успех во нејзините идни професионални предизвици, соопштија од неговиот кабинет.