Двојно е намален бројот на кафеани во земјава. На крајот на 2022 година ги имало само 74, за разлика од 2020 година кога нивниот број бил 143! Од македонското угостителско милје исчезнуваат и слаткарници, ќебапчилници, чајџилници и пицерии, покажува Статистичкиот годишник за 2023 година. За само две години – од 2020 до 2022 година – се затвориле дури 100 слаткарници, педесетина ќебапчилници и чајџилници и четириесеттина пицерии!

Така, лани во земјава имало само 34 специјализирани дуќани за слатки за разлика од 2020 година, кога биле дури 143. Ако пред две години ќебапи служеле 85 локали, сега тој специјалитет на менито го имаат само 30, а од некогашните 62 чајџилници, сега постојат само 6. Во 2020 година во земјава имало 87 пицерии, една година подоцна нивниот број пораснал на 96, а на крајот на 2022 година, нивниот број се свел на 50.

Угостителите брифираат дека сè тргнало надолу во пандемијата, а во последниве години високите цените на струјата и немањето доволно кадар е главната причина што сè повеќе угостители ставаат клуч на врата.

– Шест месеци го реновирав локалот, потоа шест месеци барав соодветен кадар. Полека се претворивме во „хотел промаја“, готвачите и помошниот кадар ги менував како чорапи. Се обидов и со самопослужување, но и од тоа немаше големо фајде. На крајот ми помина договорот за закуп, а бев во голем минус. Кренав раце од угостителството, затворив и едвај ја распродадов опремата. Во земјава има сè помалку сметка да се работи – раскажува еден македонски „угостител во обид“.

И додека опаѓа бројот на малите угостителски локали, сосема е друга сликата кај хотелите. Статистички нивниот број расте и она што е интересно е дека во земјава се исплатува да се инвестира во хотели со 5 ѕвездички (во 2020 година имало 19 такви, а во 2022 година се отворил уште еден). Пораст има и кај бројот на хотели со 4 ѕвездички и како такви се водат дури 57 (крај на 2022 година), што значи дека од 2020 година се изградиле нови три вакви капацитети. Стабилни се и бројките на хотелите со една, две и три ѕвездички, а опаѓа бројот на мотели – само 8 на крајот на 2022 година.

Инаку, храната носи најмногу пари во угостителството и од неа на крајот на 2022 година бил направен промет од речиси 8 милијарди денари, што е пораст од речиси 30 отсто во однос на 2020 година. Македонците и нивните гости трошат најмногу пари на безалкохолни пијалаци (речиси 900 милиони денари вкупен промет на крајот на 2022 година и речиси идентично за кафе 805 милиони денари).

Добар промет е направен и од пивото – 768 милиони денари, што е идентично со сумата за испиените ракии и други жестоки пијалаци.