Високата цена на гасот почна да влијае врз начинот на следење настава. Поради неможноста да се обезбеди греење, ученици наставата ја следат од дома.

Учениците од средното градежно училиште „Здравко Цветковски“ веќе два дена наставата ја следат онлајн поради проблеми со греењето. Директорката на училиштето Атина Томовска во изјава за „Слободен печат“ вели дека онлајн наставата ќе биде привремена додека Град Скопје не најде решение за проблемот.

– Моравме таква одлука да донесеме поради три пати повисоката цена на гасот. Ние сме во постојана комуникација со Градот и имаме одлична соработка. Од таму добивме согласност за наставата да ја одржуванме онлајн, а таква согласност имаме и од Министерството за образование и наука, како и од родителскиот, наставничкиот и училишниот совет. Се надеваме на брзо решавање на проблемот со што веќе од следната недела ќе ги вратиме учениците назад во училиштето. Во меѓувреме, онлајн наставата успешно се одвива, рече Томовска, без да даде конкретен одеговор зошто навреме не е обезбеден гасот неопходен за затоплување на училиштето.

Средното градежно училиште не е единственото кое се соочува со овој проблем. И учениците од средното економско училиште „Арсени Јовков“ се соочуваат со овој проблем. Директорката на ова скопско училиште на која мандатот и истекол пред кратко време вели дека учениците се уште се во училиштето но дека од МОН побарале и добиле одобрение за наставата да ја организираат онлајн.

Министерот за образование и наука, Јетон Шаќири вели дека е запознаен со проблемот и иако овој проблем би требало да го решат градоначалниците, тој информира дека утринава имал средба со градоначалниците на општините за што поскоро да се надмине проблемот. На онлајн состанокот не била присутна градоначалничката на Град Скопје Данела Арсовска.

– Не станува збор за голем број училишта во кои наставата се следи онлајн. Две се во Скопје и едно во Прилеп. Јас утринава имав онлајн состанок со градоначалниците на општините за да најдеме заедничко решение за проблемот. Градоначалничката Арсовска не беше присутна на состанокот, и иако имаше претставник од Градот, не беше покренато ова прашање. Затоа јас во текот на денот ќе остварам контакт со неа, со цел да успееме веќе од следната недела сите деца да ги вратиме во училишата, изјави министерот за образование и наука, Јетон Шаќири.