Обвинителството во германскиот град Вупертал во понеделникот објави дека семејството на поранешниот шампион во Формула 1, Михаел Шумахер, било цел на уценувачи, јавува ДПА.

Полицијата уапси двајца мажи поврзани со случајот, изјави портпаролот на обвинителството.

Според наводите, двајцата осомничени им се заканувале на вработените кај семејството Шумахер со објавување на досиеја кои семејството не ги сака во јавноста.

Побараа милион евра за да не бидат објавени на Интернет досиејата, од кои некои како потврда за заканата ги испратија до Шумахер.

Полицијата до осомничените стигнала преку „технолошка истрага“. Станува збор за жители на Вупертал, татко и син на 53 и 30 години.

Семејството на Шумахер жестоко ја заштитува неговата приватност откако тој претрпе тешка повреда на главата додека скијаше пред повеќе од една деценија.

Оттогаш тој на ниту еден начин не се појавува во јавноста и за неговата состојба само се шпекулира.

Шумахер наполни 55 години во јануари. Тој освои седум титули за Бенетон и Ферари – тој рекорд го дели со се уште активниот Британец Луис Хамилтон.