Самир Пајтон и Бранко Караколев, другари од Нов Дојран, по сопствена иницијатива, доброволно и без никаков надомест, веќе три недели го чистат го чистат отворениот канал на хидросистемот „Ѓавато“. Тие со лопати и вили го чистат наталоженото ѓубре во каналот изграден пред 20-ина години, а со моторни тримери ја косат тревата долж целиот канал, пренесе „СДК.мк“.

Идејата им дошла лани во ноември, кога вицепремиерот и министер за животна средина Изет Меџити и пратеникот Миле Цеков ги пуштија во употреба пумпите, кои неколку години не работеа. Бранко и Самир забележале дека водата се излева во околните ниви, па ги исчистиле критичните точки. Сега кога разбрале дека повторно ќе се активираат пумпите, одлучиле да го средат целиот простор за да тече водата нормално во езерото, а не во околните ниви.

„Сакавме да дадеме свој придонес за езерото. Свесни бевме дека каналот беше обраснат со трева и џбунови и во него се наталожила земја. Бидејќи слушнавме дека системот ќе се санира, решивме целосно да го исчистиме каналот за непречено течење на водата во езерото, оти претходно се излеваше. На секои 15 метри од каналот вадеме по еден кубик земја и камења, а да не зборуваме колку купишта сува трева, џбунови и гранки се собра“, вели Самир Пајтон.

Тој и неговиот најдобар другар Бранко каналот го чистат вообичаено во попладневните часови. И двајцата се невработени. Преку ден чекаат некој да ги ангажира и работат за дневница. Самир жали што во овие три недели никој од институциите, жителите на Дојран, ниту пак сопствениците на викендички не им се приклучиле во чистењето. Откако ја објавиле акцијата на социјалните мрежи почнале да добиваат поддршка. Некои им донирале храна и освежување, други алат и гориво, а непознат човек им подарил две нови машини за косење трева.

„Имаме поддршка, но друго е ако се вклучи цела заедница. Каналот е за сите нас и треба да биде функционален. Еве, сега барам да дојде некој со трактор и приколка и да се товарат отпадот и тревата што ги собравме. Ни останува уште некој ден да ја завршиме целата траса од околу 500 метри, колку што е долг отворениот канал“, вели Пајтон.

Хидросистемот „Ѓавато“ од минатата недела се санира низ отворениот канал сега не тече вода. Премиерот Христијан Мицкоски објави дека била завршена првата фаза од санацијата на пумпите на бунарското подрачје и сега ќе се пристапи кон втората фаза.