Дел од автобусите со кои ЈСП „Скопје“ превезува патници не се во возна состојба, а причина за тоа е недостигот на резервни делови за нив. Според податоците добиени од ова јавно сообраќајно претпријатие од последната утврдена состојба на возилата, од 200 двокатни кинески автобуси, во возна состојба се 160 возила, а 40 не се во функција.

-Генерално, возилата не се во возна состојба поради недостиг од резервни делови за нив. Набавката е отежната поради неможноста да се набават соодветни резервни делови од страна на потенцијалните добавувачи, имајќи во предвид дека оригинал резервни делови за возилата „јутонг“ речиси и да не постојат, а и еквивалетните делови на резервните едвај и да се наоѓаат и се прескапи, со нереална цена за квалитетот – информираат од ЈСП „Скопје“.

Оттаму објаснуваат и дека процедурата за набавка на потребните резервни делови во изминатиот период дополнително е усложнета, како последица на пандемијата предизвикана од ковид- 19.

Проблем, освен кај двокатните автобуси кои се со затворен покрив и кои редовно превезуваат патници, има и кај панорамските двокатни автобуси кои се со отворен кров и кои додека беа во функција, претставуваа своевидна атракција за скопјани, но и за сите оние кои дошле да го разгледаат главниот град од една поинаква перспектива.

-Од 16 „јутонг“ панорамски (отворени) двокатни автобуси, во функција се само два – велат од ЈСП „Скопје“.

Од претпријатието информираат дека сегашното раководство токму панорамските двокатни возила ги затекнало односно ги „наследило“ како што велат, генерално расклопени.

-Кратко време откако се набавиле, од нив се ваделе мотори, менувачи, прозорци, шофершајбни, делови од командната табла, кочници, па дури и електрика и столчиња, и дел од тие делови се потребувале за „обичните“ (затворени) кинески возила – заклучуваат од Јавното сообраќајно претпријатие „Скопје“.

За конечно решавање на проблемот со автобускиот превоз во Скопје, патниците кои редовно ги користат услугите на претпријатието, се надеваат на брза реализација на предизборното ветување на градоначалничката на Град Скопје Данела Арсовска која вети набавка на 250 нови еколошки автобуси. Според најавите, новите возила ќе им обезбедат на патниците брз, сигурен и удобен превоз, а поради поголемата бројка на возила, промена треба да претрпи и постоечкиот возен ред по кој сообраќаат автобусите, односно на една линија да има позачестено сообраќање на возилата, а со тоа и помалку гужви во автобусите.