Бранителот на Бојан Јовановски, Сашо Дуковски, во вечерашното гостување на телевизија Алфа уште еднаш повтори дека не му е јасно зошто доколку обвинителот имал чист предмет, по секоја цена сакал да избегне вештачење на телефонот на Јовановски.

-Ако јас сум обвинител и имам чист предмет и имам чисти докази, зошто јас толку бескропомисно би се борел тој телефон во ниеден случај да не биде вештачен. Тоа е тотално неразбирливо. Со вештачењето ќе се утврдеше вистинската фактичка состојба, дека нема ни Р од рекет, ни П од пари и ниту В од вина, вели Дуковски.

Адвокатот Дуковски се осврна на пресудата која што му беше изречена на неговиот клиент Бојан Јовановски во времетраење од девет години, што според него е крајно некоректна одлука која не е поткрепена на докази. Тој вели дека неговиот клиент Јовановски не е главната фигура во случајот „Рекет” и дека е злоупотребен.