Предизборното препукување на партиите од политичкиот блок на македонските Албанци, кое започна особено рано пред локалните избори закажани за наесен, денеска го продолжија опозициската ДУИ и владејачката „Вреди“, кои се натпреваруваа во убедување на своите гласачи дека вработиле повеќе Албанци во државните институции.

Најпрвин Демократската Унија за Интеграција изрази „длабока загриженост“ и „остро го осуди“ „систематското и намерно исклучување на Албанците од државните институции во Република Северна Македонија“.

Од партијата на Али Ахмети велат дека најновиот случај што јасно ја илустрира оваа загрижувачка реалност е Агенцијата за храна и ветеринарство, каде според ДУИ, од вкупно 21 вработен, нема ниту еден Албанец.

На ова одговори директорот на Центарот за јавно здравје, Мухамед Демири од „Вреди“, кој преку објава на социјалните мрежи информираше за нови промени во институцијата, кои според него биле во тоа што осумтемина последно вработени во институцијата биле Албанци.