Со пораки за меѓусебно разбирање, доверба и толеранција, државниот врв упати честитка по повод празникот Курбан Бајрам.

Претседателката Гордана Сиљановска Давкова порача дека како празник на дарувањето и на помагањето, Курбан Бајрам ја истакнува благородноста на човекот, мотивирајќи нè да се грижиме за сите членови на заедницата.

-Како општество, отсекогаш се истакнуваме со солидарноста, сплотеноста, почитта и грижата, и тоа мора и понатаму да го чуваме и да го негуваме. Живееме во сложени и динамични времиња со тектонски политички и економски промени на глобално ниво, коишто бараат мудрост, заедништво и силна волја и истрајност. Да се потпреме еден на друг, да ги развиваме емпатијата и солидарноста, и суштински да се залагаме за благосостојбата на сите наши сограѓани и за просперитет на татковината – се вели во честитката од претседателката.

Премиерот Христијан Мицкоски порача дека заложбата на Владата е да изградат држава во која има меѓусебно разбирање, почитување, доверба и толеранција.

– Празникот Курбан Бајрам нѐ потсетува на вистинските вредности и принципи во животот, а тоа е да правиме добри дела, да помагаме и да сме хумани бидејќи хуманоста и солидарноста се најголемите човечки особини. Исламската заедница и сите нејзини верници се дел од оваа држава, затоа потребно е да си подадеме рака и да ги почитуваме различностите, бидејќи само така ќе изградиме држава на среќни и задоволни граѓани, пишува во честитката.

Претседателот на Собранието, Африм Гаши во својата честитка напиша дека денешниот празник ја подразбира жртва за највозвишените вредности, нè потсетува и на важноста на солидарноста, разбирањето и меѓусебната љубов.

– Овој свет ден е момент на размислување за вредностите што нè обединуваат како општество: грижата за семејството, почитувањето на старите лица, грижата за најранливите и зајакнувањето на човечките врски што го одржуваат жив духот на човештвото и нашето општество. Во име на Собранието и во мое лично име, посакувам овој празник да донесе мир во вашите срца, радост во вашите семејства и надеж за исполнување на вашите највисоки идеали – пишува Гаши.