Македонскиот електропреносен систем-оператор (МЕПСО) ѝ донираше 2.767.500 денари (околу 45.000 евра) на ЈЗУ Специјалната болница за гинекологија и акушерство „Мајка Тереза“ во скопската општина Чаир. Со парите болницата набавила нов, модерен ехо-апарат за подобрување на дијагностиката кај бремените жени и жените со гинеколошки проблеми, соопшти државната компанија.

„Одлуката за донација ја донесовме како дел од нашата посветеност кон здравството и поддршката на граѓаните. Ова не е само збор на хартија, туку конкретна акција што го подобрува животот на луѓето“, изјави генералниот директор на МЕПСО, Бурим Љатифи, за време на денешната посета на болницата.

Од чаирската Гинекологија информираа дека вкупната вредност на апаратот изнесува над 3,5 милиони денари, при што останатиот дел од средствата – околу 800 илјади денари – се обезбедени од сопствениот буџет на установата.

Оваа донација претставува значаен чекор во унапредувањето на здравствените услуги и директно придонесува за поквалитетна грижа за женското здравје.