Државата допрва ќе го одредува конкретниот начин на кој ќе бидат санкционирани луѓето кои шират антиваксерска пропаганда. Во завршна фаза е Стратегијата за вакцинација, вели министерот за здравство Арбен Таравари.

– За жал, антиваксерството не само во Македонија, туку и во светски рамки зема се поголем замав. Со Светската здравствена организација подготвуваме Стратегија за вакцинација и се надевам во ноември или почеток на декември ќе ја промовираме и ќе кажеме законски што можеме да преземеме на овој план, рече Таравари.

Таравари денеска прими вакцина против сезонски грип. Министерот за здравство беше имунизиран во пунктот наменет за здравствени работници од каде порача дека превентивата е најдобра заштита од серизоните компликации кои можат да настанат..

-Ги повикувам сите граѓани, особено оние кои се во ранливите категории да ја примат оваа вакцина бидејќи со тоа се оневозможува да се појават компликации особено кај повозрасни луѓе кои имаат и други коморбидитети, изјави Арбен Таравари, министер за здравство.