Дрво падна на кејот на Вардар, веднаш пред куќичките каде што се продаваат стари книги, спроти градилиштето кај „Холидеј ин“. Станува збор за старо и исушено дрво, речиси без корени, кое за среќа, при падот не повредило некој минувач, но затоа паднато стебло ја попречи целата пешачка патека на кејот. Во негова непосредна близина има уште едно такво дрво, кое се уште стои исправено.

Како што можевме да забележиме на местото на настанот, иако дрвото е во ужасна состојба, на неговото стебло немаше никакви ознаки дека е бележено за кастрење или за сечење.

Од ЈП „Паркови и зеленило“ не одговорија зошто досега не ја утврдиле состојбата на дрвото од кое можеше да настрада некој граѓанин, но знаејќи дека од јавното претпријатие постапуваат главно по претходна пријава, веројатно никој не пријавил, што секако не е оправдување што надлежните не си ја вршат работата како што треба.

Доколку вакво необележено дрво падне врз паркиран автомобил, никому ништо, дури ни штетата на сопственикот не би му била покриена, оти се обештетува само доколку дрвото е обележено за сечење и навреме тоа не се направило.

Но, затоа до претпријатието стигнала пријава дека дрвото е паднато, па оттаму, како што велат, брзо реагирале за да го тргнат од кејот.

Ве информираме дека денес по пријава за паднато дрво на посочената локација односно на кејот на Вардар, спроти градилиштето кај ,,Холидеј Ин” оперативните екипи од сектор Дрвореди веднаш пристапија со отстранување – информираа од претпријатието, од каде ни испратија и фотографии дека работат на терен.