17-годишно момче попладнево било погодено од струен удар кога се качило на вагон-цистерна во населбата Кисела Вода.

Од МВР велат дека по инцидентот вагонот се запалил, а момчето, кое е од Волково, било пренесено во Ургентниот центар.

„Денеска во 14.55 часот на пругата на територија на Кисела Вода, 17-годишник од Волково, кој бил качен на цистерна-вагон, доживеал струен удар, при што цистерната се запалила. Со возило на Итна помош, повредениот е пренесен во Ургентен центар“, велат од МВР.

Засега нема информации за здравствената состојба на момчето.

Во изминативе години имаше слични инциденти со железнички вагони и струја, во кои тинејџери снимале видеа за социјалната мрежа „ТикТок“ качени на вагоните. Некои од тие случаи завршија со фатални последици.