Еурофарм Пелистер по две години во кои минатата година загуби од Алкалоид, а претходно од Вардар денеска во драматичен натпревар славеше победа со 28-27 и конечно го освои трофејот во Суперкупот.

Дербито започна со доцнење, а на теренот  во почетните минути подобар беше битолскиот состав, но потоа Вардар го подигна темпото и поведе со 10-6. Таа предност Вардар ја чуваше до завршницата од првиот дел кога Пелистер се врати и на пауза замина со еден гол негатива. Вториот дел започна подобро за Пелистер кој некаде на десетина минути пред крајот имаше водство од четири гола разлика 26-22.

Натпреварот влезе во драматична завршница и победникот се решаваше во последните минути од средбата. Со серија од 4-0 од Вардар, иако изгледаше дека е во загубена ситуација се врати во натпреварот и изедначи на 26-26. Одличен во тие моменти беше Гогов кој одбрани тешки топки.

Битолскиот состав сепак, дојде до ново водство од 27-26. Вардар на 40 секунди пред крајот изедначи со гол од седмерец на Јапонецот, Кавада кој одигра одличен натпевар и за него ова беше шести гол во натпреварот.

За Пелистер остана време да тргне во напад за победа, а стратегот Гарабаја повика и тајм-аут за последниот напад. Херој на шампионот од Суперлигата во тие моменти беше Тунижанецот Хосни, кој на шест секунди до крајот го реализираше нападот кој значеше и трофеј за битолчани.

Овој трофеј за Еурофарм Пелистер е вкупно трети во Суперкупот, а победата над најголемиот ривал беше четврта во низа во меѓусебните натпревари.