Македонија конечно ќе добие закон за донирање вишок храна. Ова практично значи дека храната што останува по рестораните и киосците за брза храна, легално ќе им се донира на ранливите категории граѓани. Досега во ниту еден закон не постоеше терминот „вишок храна“. Законот првично беше предложен пред четири години, но досега немаше услови за негово донесување. Со него се предвидуваат и казни затвор доколку не се испочитува некоја одредба за преземање и донирање храна. Донирањето дополнително ќе се мотивира и со зголемените цени за фрлање на храната во депонија, кои досега ги плаќаа кафеанџиите. Овој пат се предвидени трипати повисоки цени.

Од народните кујни и „Банката за храна“ ја поздравуваат одлуката за донесување ваков закон.

– Конечно добиваме Закон за вишок на храна, кој ќе го регулира целиот процес – вели Душко Христов, раководител на „Банката за храна“.

Според него, ова е многу сложен процес, кој треба добро да се осмисли и да се спроведе за да бидат задоволни сите страни.

– За да се подели вишокот храна, тој што ја дели мора да има возило ладилник. При преземање, ќе треба да има соодветни садови во кои ќе се дели храната – вели Христов.

За да се донира храната што останува, потребно е да се исполнат неколку услови: да имаат соодветно складиште за храната кое ќе се одржува свежа, да има соодветен превоз и вработено лице за таа намена.

Според Предлог-законот, планирано е да се направи регистар на сите фирми што имаат вишок храна. Тие ќе добијат пасворд со кој ќе влегуваат на одредена платформа, на која ќе пријавуваат колку вишок храна имаат. Народните кујни ќе бидат должни да ја преземат и да ја поделат, а потоа на истата платформа ќе треба да пријават дека храната е стигната до крајните корисници за да нема злоупотреби. Преземањето храна ќе биде на принципот „прв дојден – прв услужен“. Законот предвидува големи парични казни, затворање на објектите, дури и казни затвор за спречување злоупотреби.

Во народните кујни велат дека досега вишокот храна се третираше како донација.

– Оброците стигнуваат кај нас во возила со ладилник, спакувани во посебни садови, по што се делеа на крајните корисници, но сè се правеше премолчено, бидејќи немаше законско решение. Се надеваме дека системот што ќе се воспостави, конечно ќе профункционира, ќе биде добар и ќе се почитува – велат од народните кујни.

Организацијата за храна и земјоделство на Обединетите нации (ФАО) ја рангира Македонија на осмото место во светски рамки според количеството фрлена храна во однос на бројот на жители. Најмногу се фрла овошје и зеленчук, а најмалку живина и риба. Податоците што јавно се објавуваат, покажуваат дека во Македонија годишно се фрла храна во огромни количества, кои можат да нахранат приближно 13.000 граѓани со три оброци дневно.