Според документ кој што го поседува „Слободен печат“, односно нацрт-записник од 166 седница на владата одржана на 11 јули годинава, произлегува дека Министерството за здравство и Владата имале намера и одобриле на „Брако“ да му се платат модуларните амбуланти што беа изградени во Скопје, а во замена за тоа „Брако“ да се откаже од каматите кои се напластиле поради задоцнетото плаќање, а кои според Министерството изнесуваат 200 илјади евра.

„Владата ја разгледа Информацијата за прогресот и активностите поврзани со проектот Замена на времени објекти од амбулантско-поликлиничка дејност на Здравствен дом Скопје со прилози, ја усвои информацијата и го задолжи Министерството за здравство спогодбено да го раскине договорот за остварување на сите понатамошни права и обврски и да потпишат спогодба каде ќе биде наведено дека тужителот е согласен да го повлече барањето за наплата на камати, а во рок од 30 дена по потпишувањето на спогодбата Министерството за здравство да го плати вкупниот долг без затезни камати и други трошоци, да ја врати банкарската гаранција и двете страни да не побаруваат меѓусебно штета или други парични побарувања“, пишува во извадокот од нацрт – записникот на 166 седница на Владата што се одржала на 11 јули.

Деновиве министерот за здравство Фатмир Меџити и премиерот Димитар Ковачевски даваат спротивни изјави на овој документ. „Слободен печат“ испрати прашања и до МЗ и до Владата со барање за појаснување како, ем се имало намера да се склучи спогодба за амбулантите, ем високите владини претставници даваат изјави во јавноста дека сметаат оти исплатата не треба да се случи додека не завршат сите правосудни постапки. Одговор не добивме ниту од Министерството за здравство ниту од Владата.

Премиерот Ковачевски денеска во врска со предметот каде изгореа 14 сограѓани во тетовската модуларна болница кажа дека според негово лично мислење, трите амбуланти во Скопје кои се модуларни, не би требало да му се платат на изведувачот до завршувањето на истрагата.

– Преостанатите модуларни болници за Здравствениот дом Скопје, не се платени. Имаше поранешни министри кои почнаа политички да се препукуваат со своите наследници. Екс министерот за здравство Беким Сали има нарачано ревизија, ревизијата е доставена до Владата заедно со документите за неплатените модуларни болници. Врз основа на тие документи Владата одлучува, но плаќањето на преостанатите, според мене лично, ќе може да се заврши кога ќе завршат сите правосудни постапки, рече Ковачевски.

Тоа е директно контрадикторно на она кое Владата како заклучок го донела пред 5 недели на седница.
И министерот за здравство Фатмир Меџити инсистира на тоа дека Министерството нема исплатено ни денар на „Брако“. Меѓутоа, документите сугерираат дека имало намера да се плати и била одобрена од Владата, а за тоа Меџити дури и јавно се пофалил во медиумите.

На страницата на владата каде се споделуваат соопштенија за тоа што се дискутирало на владините сединци, оваа информација не беше споделена, но од фотографиите е евидентно дека на 11 јули Меџити бил на владина седница.