Дивата ординација за лекување стерилитет која во центарот на Скопје функционира без дозвола за работа, а во која ординира докторот без лиценца Д.Р., остана недостапна за здравствените инспектори.

Откако „Слободен печат“ ја откри оваа ординација на начин што самите влеговме на преглед како „пациенти“ за непосредно да се увериме како функционира оваа нерегулирана медицинска пракса, инспекторите на Државниот здравствен и санитарен инспекторат не успеаја да ја потврдат нашата информација и не успеаја да го решат проблемот. Зошто? Затоа што докторот не ја отворал вратата. Како „пациенти“ кои влеговме во оваа ординација, сведоци бевме дека доктор Д.Р. иако нема лиценца и иако ординира на диво, сепак, непречено се впушта и во администрирање терапија и инјекции. Така, на пациентот кој пред нас имаше закажано третман, доктор Д.Р. му администрираше инјекција и го третираше со ласер.

Инспектори од Државниот здравствен и санитарен инспекторат двапати не успеале да го потврдат ова, зашто докторот не им отворал врата од својот стан од каде како што претходно пишувавме – ги откорнал и ѕвончињата пред влезната врата.

Директорката на Државниот здравствен и санитарен инспекторат Рената Младеновска на 3 април годинава, пет дена по објавувањето на нашата сторија, издала налог нејзините инспектори да извршат единечен вонреден надзор во „Центарот за стерилитет“ лоциран на улицата „Народен фронт“ во Скопје, а во врска со објавата во „Слободен печат“ за незаконско работење на доктор Д.Р. во простор за кој нема дозвола за работа од Министерството за здравство и е без важечка лиценца за работа.

„Од страна на Државниот здравствен и санитарен инспекторат ПО Центар, направен е обид за вршење на вонреден инспекциски надзор во гореспоменатиот објект во два наврати и тоа на трети април во 11 часот и 30 минути и на ден четврти април во 14 часот и 20 минути при што е констатирано дека на посочената адреса, на самиот влез од станбената зграда испишано е „Центар за стерил“. На вратата од самиот стан и над неа, нема истакната табла со назив на центарот ниту истакнато работно време или телефонски број за контакт. Поради неможност да се заѕвони, затоа што ѕвончето е откачено, потропано е на самата врата неколку пати но без одговор“, велат од ДСЗИ во одговор за „Слободен печат“ на прашањето дали постапиле за конкретната сторија која ја објавивме.

Оттаму додаваат дека „со оглед на тоа што се работи за приватен стан, како и заради немање начин да се стапи во контакт со сопственикот или корисникот на објектот, ДСЗИ не беше во можност да го изврши вонредниот инспекциски надзор“.

За да се спроведе надзорот со асистенција на полиција, потребно е да биде присутен и сопственикот на објектот со оглед дека се работи за приватен имот, додаваат оттаму.

Како што „Слободен печат“ претходно објави, докторот Д.Р. нема лиценца од Лекарската комора, а во својата дива ординација во скопски Капиштец, прима и лекува од стерилитет пациенти и од Македонија и од соседството. Нејасно е дали тие знаат дека влегуваат во нерегистрирана ординација и дека докторот нема активна лиценца бидејќи малку фактори асоцираат дека тоа е така. Имено, докторот носи бел мантил, има комплетно опремена ординација со бокс, ласер, медицински елементи, а ни даде и специјалистички упат на кој стави печат со своето име и презиме, иако тој упат беше од старите, кои што не се во употреба со години. Тој ни кажа дека лекувањето кај него не се наплаќа доколку не дојде до успешна бременост, но од наши извори дознаваме дека кога бременоста е успешна наплатата е во илјадници евра.

-Од сите пациенти кои ќе дојдат на третман, 10 проценти ќе забременат независно од третманите што му се спроведуваат, природно. Токму на нив печали докторот. Неговото семејство е лекарско семејство со конекции во повеќе клиники на Клинички центар а фамилијарно е поврзан и со поранешен претседател на Лекарската Комора. Оттаму потекнува и тоа што со години се преправаат дека не го гледаат неговото функционирање, коментира за „Слободен печат“ доброупатен извор кој работи во областа на биомедицински потпомогнатото оплодување а кој работи во легална и етаблирана ординација за лекување стерилитет во Скопје.

ДСЗИ ја затворил оваа ординација во 2015 година и ја заборавил. Никој надлежен не се секира дали решенијата за забрана се почитуваат во 2023 година.

„Вонреден инспекциски надзор е вршен во период пред 2015 година, а во врска со акција при што се контролирани ординации по гинеоклогија и акушерство. Притоа е издадено решение за забрана за вршење дејност со оглед на тоа што затекнатото лице Д.Р. не приложил решение за вршење здравствена дејност издадено од Министерството за здравство, изјавија од Државниот здравствен и санитарен инспекторат за „Слободен печат“.

Додека докторот без лиценца не им ја отвори вратата на инспекторите од својот стан, непречено ќе ја обавува својата нерегистрирана дејност врз пациентите кои се борат да добијат дете. Пациентите, како што се уверивме и самите, ги запишува во дебел син кожен тефтер, каде што не запиша и нас.