Со цел стимулирање на развојот на научната мисла во земјата и заради афирмација на младите стручни кадри веќе 40 години Народната банка доделува Годишна награда за млади истражувачи.

Годинава награден со втора награда е Ален Калач за трудот „Унапредување на процесот на кредитна анализа кај банките преку употреба на методи од машинско учење”.

Трудот на Калач беше оценет со највисока просечна оценка, во согласност со критериумите од објавениот конкурс.

Конкурсот за годинешната Награда беше објавен кон средината на минатата, а трудовите се доставуваа до 1 февруари оваа година. Согласно стандардно утврдените правила, право на учество на конкурсот имаат авторите од земјата на возраст до триесет и пет години, при што секој автор може да конкурира само со еден труд, којшто задолжително треба да содржи и осврт кон македонската економија на соодветната тема. На годинешниот конкурс беа уредно пристигнати и разгледани вкупно пет трудови од млади истражувачи.