Екипата на „Слободен печат“ вчера излезе на булеварот „12-та Македонска ударна бригада“ да види дали Град Скопје почна со поставување на ветените гумени перничиња од двете страни на булеварот.

На терен можевме да забележиме дека нема ништо од ветеното, иако градските власти рекоа дека до 15-ти овој месец ќе биде завршено поставувањето, а додека жителите на оваа скопска населба чекаат, возачите и натаму со брзина над дозволеното возат по овој булевар.

Само за потестување, жителите на Лисиче десетина дена протестираа долж булеварот „12-та Македонска ударна бригада“ барајќи поставување на семафори на неколку раскрсници со цел да се зголеми безбедноста во сообраќајот и да се стопираат возачите кои со голема брзина минуваат по булеварот.

Тие, по разговорите кои се оддржаа некаде на средината на минатиот месец со шефот на кабинетот на градоначалникот Петре Шилегов, на кој им беше ветено дека до 15 октомври ќе бидат поставени гумени перничиња од двети страни на булеварот, одучија да стават крај на секојдневните протести кои траеја по еден час.

– Ова во моментов е одлично решение, затоа што конечно добивме некакво ветување и работите се поместија од „мртва точка“. Очекуваме Градот да го исполни ветеното и затоа до рокот кој ни го споменаа ќе престанеме со протестите. Оставаме да видиме како ќе се одвиваат работите, но доколку ништо не се промени до 15 октомври, тогаш ќе продолжиме порадикално и ќе ја блокираме раскрсницата меѓу булеварите „Србија“, „3-та Македонска ударна бригада“ и „12-та Македонска ударна бригада“, изјавија тогаш за „Слободен печат“ дел од огранизаторите на протестот.

Сепак остануваат уште речиси петнаесетина дена до реализација на ветеното од страна на Градот Скопје за да се зголеми безбедноста за жителите на оваа населба, па останува да видиме дали ќе дојде до реализирање на ветеното.

Лисичани делумно ја постигнаа целта: Со „перничиња“ ќе се стопираат бесните возачи