Во Кисела Вода се гради затворен пливачки базен во основното училиште „Невена Георгиева Дуња“. Овој базен чија изградба беше во неколкугодишен застој, како што соопшти Општина Кисела Вода, ќе биде завршен кон крајот на мај.

Станува збор за базен од затворен тип со должина од 25 метри, ширина 9 метри и длабочина 1.2 метри односно 0.8 метри во останатиот дел.

Пливањето, како еден од најкомплексните спортови, има огромно значење за здравјето и развојот на младите генерации. Со оваа инвестиција, овозможуваме не само услови за развој на спортски таленти, туку и простор за рекреација и здрав живот за сите жители на општината, рече градоначалникот Орце Ѓорѓиевски, кој денеска заедно со министерот за спорт Борко Ристовски беа во увид на градежните работи.

Тој истакна дека во изминативе три години Општина Кисела Вода направила значителни вложувања во спортската инфраструктура – обновивме и изградивме девет спортско-рекреативни центри.