Рокот за набавка, монтажа и пуштање во работа на системот за компримиран воздух на Клиничкиот центар „Мајка Тереза“ изнесува четири месеци од денот на склучување на договорот и тој истекува на крајот на месец јануари, велат за „Слободен печат“ од Министерството за здравство.

Компресорската станица не работи со месеци, што ги остава хируршките клиники да работат со надворешни компресори. Обновувањето на станицата е поради тоа што старата е дотраена и некомпатибилна со европските стандарди.

Во тек се активности кои претходат за непречено поставување и инсталирање на системот за компримиран воздух, замена и монтажа на нов бакарен цевен развод, приклучни места, како и разводни ормани за компримиран воздух за снабдување на оперативниот блок, за на крај да се изврши монтирање на три нови компресори со сета потребна придружна опрема. Се преземаат сите активности со цел навремено и во наведениот рок целосно да се заврши набавката, монтажата и пуштањето во работа на системот за компримиран воздух, ни рекоа од Министерството за здравство.

На тендерот кој првиот пат (кога беше распишан од Службата за заеднички работи на Клинички центар) пропадна – вториот пат се пријави фирмата „Винора“ и таа е добитничка на тендерот за поставување на компресорскиот систем на хируршките клиники. Оваа фирма е специјализирана за проектирање, изведба и одржување на системи за снабдување со медицински гасови и вакуум во здравствените институции ширум земјата.

Пред да се склучи договорот за замена на компресорската станица, беше извршено мерење од странска компанија за квалитетот на воздухот. Мерењето што го изврши германската компанија „Дрегер“ по нарачка на Министерството за здравство покажа дека компримираниот воздух, кој според европските прописи се смета за лек, во компресорската станица на Клинички центар – отстапувал од европските стандарди. Станицата за компримиран воздух е пуштена во употреба во 1992 година и во тоа време била во согласност со регионалните регулативи. Станицата е одржувана во согласност со препораките на производителот.

Мерењето кое е извршено на 3 јуни 2024 година покажува ниво на влага во медицинскиот воздух од 245 ппм, додека нивото на маслена пареа е измерено и изнесува 0,6 милиграми на метар кубен и на мерното место во станиците и во оперативниот блок.

Нивото на влага кое го пропишува европската фармакопеја е 67 ппм додека за маслена пареа 0,1 милиграми на метар кубен. Начинот на кој медицинскиот воздух треба да се доведе на ниво пропишано со стандардот е замена на целата станица. Овие измерени вредности се во границите на очекуваните резултати за овој вид и старост на опремата“, пишува Дрегер во извештајот од мерењето.

Хируршките сали во Клинички центар со месеци работат со надворешни компресори за со нив да се одвиваат операциите.