Во Вишото јавно обвинителство во Зајечар пристигнал извештајот од судските вештаци од Белград, чијашто задача била да ги анализираат и споредат фактите добиени на терен за време на реконструкцијата на исчезнувањето и убиството на двегодишната Данка Илиќ. Анализата ги потврдила сомнежите на истражителите за времето, местото и начинот на кој Данка Илиќ исчезнала на кобниот ден.

За убиството на девојчето во Банско Поле кај Бор се сомничат Дејан Драгијевиќ и Срѓан Јанковиќ.

Реконструкцијата на настанот на местото на настанот беше извршена на 16 јуни годинава. Тогаш во Банско Поле беше „пресликан“ денот на исчезнувањето на девојчето – 26 март минатата година, а на местото на злосторството од притвор беа доведени и Драгијевиќ и Јанковиќ.

– Ги добивме резултатите од анализата на реконструкцијата што ја изврши Националниот центар за криминалистичка форензика во Белград. Во нивната анализа сè се поклопува: времето, изјавите на сведоците, трагите. Сега чекаме да ни пристигнат и резултатите од анализата на реконструкцијата од Факултетот за технички науки – Оддел за сообраќај од Нови Сад. Тие, меѓу другото, ги споредуваат фактите од теренот, изјавите на сведоците, ги прегледуваат надзорните камери – потврди Обвинителството.

Експертите од Нови Сад, се додава, треба да се изјаснат дали возилото на осомничените го удрило девојчето, како и да го анализираат движењето на возилото тој ден, и тоа во секоја секунда.

„Треба да се изведат докази дали детето е живо или не“

Адвокатката Милица Митровиќ вели дека не смета оти обвинителството многу напреднало во однос на претходниот период – реконструкцијата е направена, проверени се исказите и различните верзии на сведоците, но според неа првото прашање за кое треба да се изведат докази е дали детето е живо или не, објави „Курир“.

– Ако зборуваме за потенцијален основан сомнеж за тешко убиство, првин мораме да утврдиме дали има докази дека детето не е живо. Околностите под кои е извршено потенцијалното кривично дело… мене не ми е познато дека се изведени докази кои укажуваат дека детето починало – изјави Митровиќ.

„Ќе се утврди дали Данка била удрена од автомобил“

Новинарот Младен Радуловиќ истакнува дека, доколку обвинителството не е способно обвинението да го доведе до правосилност, тешко дека некој друг, особено надвор од државниот систем, ќе знае нешто повеќе за случајот:

– Многумина зборуваат за ова како за убиство на Данка Илиќ. Морам да потсетам дека нема докази кои го поткрепуваат тоа тврдење, освен наводното сведочење на еден од обвинетите. Тој раскажал дека девојчето било удрено со автомобил, а потоа задавено. Сепак, сега се врши едно клучно вештачење за кое верувам дека ќе донесе пресврт во истрагата – рече Радуловиќ.

Тој нагласува дека анализата што треба да ја изврши Факултетот за технички науки во Нови Сад е од суштинско значење – тој треба дефинитивно да ја потврди или да ја отфрли теоријата дека Данка е удрена со автомобил.

Според него, ако не се докаже дека девојчето било удрено, осомничените ќе мора да бидат пуштени на слобода.

– Ова е голема мистерија за целата држава. Детето исчезнува за неколку минути без никаков траг, никој не знае каде е, цела Србија се крена да го бара, сите се вклучија. Луѓето на терен и МВР со сета техника не успеаја да ја најдат Данка – додаде Радуловиќ.

„Никогаш не беше направен увид“

Новинарот Недиќ посочува дека отежнувачка околност е тоа што, како што соопштил Вишиот суд во Зајечар, не бил направен увид.

– Увид не беше направен бидејќи случајот се водеше како исчезнато лице. Од 26 март до почетокот на април, кога беа уапсени осомничените и кога го признаа злосторството, тогаш се излезе на терен. Но тоа веќе не беше вистински увид бидејќи поминаа неколку дена – вели Недиќ.

Тој додава дека за тоа време луѓето кои учествувале во исчезнувањето или убиството на детето можеле да манипулираат со доказите.

– Нема тело, нема докази дека тој автомобил го удрил детето. Имав детален увид во истрагата, она што го заклучивме, а што го потврдија и вештаците, е дека детето во критичниот период било таму, дека мајката го сликала и дека потоа исчезнало. Докажано е и дека двајцата осомничени се нашле во тој момент на тоа место, што и самите го признаа – рече Недиќ.