Компанијата за забава „Дизни“ објави дека ќе го изгради својот седми тематски парк, овојпат во Обединетите Арапски Емирати, пишува „Јуроњуз“.

Паркот ќе биде сместен покрај вода, на островот Јас, на периферијата на Абу Даби, каде веќе се наоѓаат Формула 1 Гран при на Абу Даби, забавните паркови на „Ферари“ и „Ворнер Брос“, „СиВорлд“ и еден аквапарк.

Абу Даби е главен град на Обединетите Арапски Емирати, федерација од седум шеикдоми на Арапскиот Полуостров. Со популација од околу 9 милиони жители, државата успешно ги користи своите долги летови преку авио-компаниите „Емирејтс“ и „Етихад Ервејс“ за да привлече туристи. Наглиот раст на пазарот за недвижности и рекордниот број туристи ја претворија и Дубаи во светска дестинација, не само како транзитна точка.

„Дизни“ и компанијата „Мирал“, инвеститорот од Абу Даби кој го надгледува проектот, се надеваат дека ќе успеат да ги привлечат 120 милиони патници што секоја година поминуваат низ аеродромите во Абу Даби и Дубаи.

Иако долго време се сметаше за посериозен град од соседниот Дубаи, познат по плажите и ноќниот живот, Абу Даби денес е дом на музејот „Лувр Абу Даби“, а се градат и други културни институции.

Најавата за тематскиот парк доаѓа пред планираната посета на американскиот претседател Доналд Трамп во регионот следната недела. Трамп најави серија трговски договори со Саудиска Арабија, Катар и ОАЕ.

Паркот ќе го гради и управува „Мирал“, компанијата која стои зад речиси сите забавни комплекси на островот Јас.

Од друга страна, „Дизни“ ќе биде одговорен за дизајнот и развојот, ќе ја лиценцира својата интелектуална сопственост и ќе обезбеди услуги за развој и менаџирање, се наведува во регулаторна пријава.

Компанијата од Калифорнија нема да вложи капитал во проектот, туку ќе заработува преку лиценцни надоместоци што ќе зависат од приходите на ресортот, како и преку надоместоци за услугите.

Минатата година, „Дизни“ најави планови да инвестира 60 милијарди долари (околу 55,3 милијарди евра) во своите тематски паркови во следната деценија, кои остануваат еден од нејзините најголеми извори на приходи.

Датумот на отворање на паркот во ОАЕ сѐ уште не е објавен.