Како еден од најочекуваните и најскапите филмови на годината, би било логично Дизни да организира гламурозна премиера за претстојниот филм Снежана. Сепак, директорите на студиото одлучиле да не одржат официјална премиера во Обединетото Кралство поради страв од реакции поради наводниот „woke“ пристап на филмот.

Иако филмот официјално треба да биде објавен кон крајот на март, тој веќе наиде на критики од критичарите бидејќи улогата на Снежана ја игра латиноамериканската актерка Рејчел Зеглер, а насловот на филмот не вклучува „седум џуџиња“. Наместо голема премиера, ќе се одржат само ограничен број внимателно контролирани прес-настани.

„Дизни веќе очекува реакција за филмот Снежана, па затоа го намалија распоредот на медиумите на само неколку строго контролирани настани во печатот. Затоа донесоа необична одлука да не одржат премиера во Лондон и да го минимизираат бројот на новинарски прашања насочени кон Рејчел Зеглер“, пренесува „Индекс.хр“

Рејчел Зеглер под критики

Оваа одлука доаѓа откако главната актерка Рејчел Зеглер беше наречена „ПР катастрофа за Дизни“ поради нејзините контроверзни изјави за филмот. Во интервју од 2022 година, 23-годишната Зеглер го нарече оригиналниот филм од 1937 година „застарен“ и ја критикуваше Снежана и врската на принцот како „момче што буквално ја демне“. Таа исто така додала дека филмот го смета за „чуден“.

Во едно претходно интервју, Зеглер, исто така, го критикувала „проблематичното“ прикажување на принцезите и машките ликови на Дизни на високи позиции на моќ, истакнувајќи како анимираниот филм ја плашел како дете – дополнително подгревајќи ја контроверзноста.

Покрај нејзините коментари, изборот на Рејчел Зеглер за улогата на Снежана предизвика дополнителни контроверзии во контекст на поновата политика на Дизни за културно репрезентативно раскажување приказни. Со оглед на тоа што Зеглер е со полско-колумбиско потекло, многумина се прашуваа зошто ѝ беше доделена улогата на лик кој по потекло доаѓа од Германија.

Филмот требаше да излезе во 2024 година, но премиерата беше одложена за 21 март 2025 година поради штрајкот на актерите од „SAG-AFTRA“ во 2023 година.

Првиот трејлер за Снежана, објавен во декември 2024 година, беше критикуван за прекумерната употреба на ефекти. Незадоволство изразил и Дејвид Хенд, син на еден од аниматорите на оригиналниот филм, кој изјавил дека неговиот татко и Волт Дизни би биле „згрозени“.

Повици за бојкот

Покрај негативните реакции за самиот филм, се појавија и политички мотивирани повици за бојкот. Пропалестинските и антиизраелските активисти повикаа на бојкот на филмот поради кастингот на израелската актерка Гал Гадот (39) во улогата на Злобната кралица. Гадот, позната по улогата во „Wonder Woman“, со години јавно му изразува поддршка на Израел.

Од друга страна, Рејчел Зеглер го промовираше трејлерот за филмот со ознаката „Слободна Палестина“, што дополнително ги зголеми тензиите.

И покрај се, премиерата на филмот сепак ќе се одржи во САД, каде се очекува да биде присутна главната актерска екипа, меѓу кои и Рејчел Зеглер, Гал Гадот и Ендрју Бурнап (34) кој го игра принцот.