Најновите две изданија на независната музичка издавачка куќа „Шарла рекордс“ се во вид на ЕП-објави на двајца соло артисти: Сашо Митревски – „И бол и бес“ и проектот „Waltz in Wires“ – „Празна соба“ на охридскиот артист Санел Ајруловски.

Сашо Митревски е познат како долгогодишен пејач и гитарист на бендот „Милко“, со кој веќе има потпишано три албумски остварувања во последните 15 години. Станува збор за искусен автор со карактеристичен музички стил и звук инспириран од најдобрите примери на британската независна рок-сцена од минатиот век.

Она што го издвојува од другите на ова издание е зрелоста како композитор, но и изведувач со свеж и исклучително софистициран музички израз. Како соло артист, ова му е трето издание, а прво под етикетата на „Шарла рекордс“.

Проектот „Waltz in Wires“ е псевдонимот зад кој стои охридскиот музичар Санел Ајруловски. ЕП-то „Празна соба“ е негово трето издание за „Шарла рекордс“, второ на македонски јазик по успешното деби со „Златни мугри“.

И овде Санел ја задржува стилската линија на постпанк / дарквејв звукот од раните 80-ти години на минатиот век, со современа и чиста продукција која става акцент на самите композиции. Помеѓу нив се наоѓа и една обработка на песната „Јуда“ на култниот македонски бенд „Мизар“.

(Текстот е објавен во „Културен печат“ број 233, во печатеното издание на весникот „Слободен печат“ на 1-2.6.2024)