Зачестени музички средби со напредното „граџанство“ најавија од независната музичка дискографска куќа „Шарла Рекордс“ по поводот десетгодишното опстојување низ орбитите на македонската музичка (и не само музичка) паралелна стварност. Скромно, без галама и без ничија финансиска поддршка, подготвени се серија од неколку настани со различни содржини и на различни локации под еден наслов „Шарла – 10 лета околу“.

Одбележувањето на јубилејот почнува со битолската кантавторка Димитра, која ќе одржи концерт на 23 јуни, со почеток во 21 часот, во кафе-книжарницата „Буква“ во Скопје.

Димитра е актуелна со новиот албум „Работ на акција“, додека со претходниот „Мак мрак“ лесно ги запоседна годишните топ-листи на најдобри албумски остварувања во регионот.

– На концертот таа ќе го изведе во живо целиот материјал од „Работ на акција“ и ќе подаде рака на музичко пријателство, онака како што тоа го прави на веќе пет музички изданија позади себе. Притоа, во прекрасниот амбиент на дворот на „Буква“ ќе можете да си набавите тазе јубилеен „Шарла merch“ пригодно подготвен за оваа прилика – маици, беџеви, плакати, ЦД-изданија и музички прегратки во вид на песни од артистите и бендовите – посочуваат од „Шарла Рекордс“.

Приказната на „Шарла“ тргна во октомври 2013 година, како издавачка авантура изнедрена од студиото на култната радиостаница „Канал 103“. Основачката парадигма која беше и остана до денес главен двигател на дискографската куќа е да промовира нови артисти и бендови низ својот сопствен, автентичен стил и начин на работа. Како дискографска куќа досега имаат издадено близу 100 музички изданија.