Целовечерна прослава на диско-принципот со настапи во живо на Македонка, Пепи & Шабан, Тодор Караколев, музичка селекција на Јоана Ристеска и Стефан Алијевиќ насловена „Диско пар“, заокружени со „Ненаситен дисколаж“ – интервенција во простор на колективот „Партизанска штампа“ ќе се одржи на 20 септември, од 21 часот, во кафе „Котур“ во Скопје.

Како и многу други приказни за потеклото и оваа започнува со среќен инцидент. Во октомври 1959 година, поранешниот ресторан „The Scotch Club“ во Ахен, Северна Рајна Вестфалија, се трансформира во сала за игранки. Газдата штедел на бендови и решил да користи плочи. Тогаш доаѓа младиот Клаус Квирини (Klaus Quirini), подоцна познат како диџеј Хајнрих, кој го зачнува она што потоа во светот стана познато како „диско“.

– Диско-ерата делуваше како култура за формирање идентитет, како израз на движења за општествено ослободување, на музички иновации и танцова извонредност. Таа имаше влијание врз модата, внатрешниот дизајн и вопшто врз целоснaта култура на живеење. 65 години подоцна, не сакаме само да се сеќаваме на тоа, туку и да покажеме како сцената денес се однесува кон феноменот „диско како принцип“ – истакнуваат организаторите на настанот.

Во организацијата на настанот се вклучени Гете институт Скопје во соработка со „Партизанска штампа“, „5060“ и „Канал 103“.

Тодор Караколев е песнописец и електронски продуцент кој создава емотивно набиена музика со духовити и општествено свесни текстови. Беспрекорно се движи низ различни жанрови, како мутант-техно, краут, пост-диско, итало… и сето тоа со префинето чувство за македонските фолк и поп-традиции. Музика за танц со мрачен и изопачен сексапил.

Александар Ордев и Максимилијан Сарајлија (Пепи & Шабан) припаѓаат на две различни генерации електронски гикови и истражувачи на звук, поврзани преку нивните заеднички опсесии во (не)променливиот модуларен град Скопје. Флуидни идентитети и извори на звук, вицотека.мк, непредвидлив и бесконечен дисколаж.

Македонка е модерна вештерка, нов глас со архаично ехо. Со провокативна „spoken word“ лирика разлеана врз хипнотички електронски битови, таа ги истражува темите на политиката, идентитетот и сексуалноста.

Интервенцијата во простор на „Партизанска штампа“ со наслов „Ненаситен дисколаж“ ќе претстави бунтовна колажна уметност која го рефлектира субверзивниот и разигран дух на диско-клубот, предизвикува норми и ја слави индивидуалноста преку колективно задоволство.