На најстариот филмски фестивал во Венеција оваа година немаше македонски филмски остварувања, но затоа „Бич филм фестивал“ (Beach Film Festival) објави дека беше поканет да учествува како панелист на 26-та Евромедитеранска конференција за кино „Мобилно кино: ново коине за младите eвромедитеранци за поттикнување на мир и толеранција“, која се одржа на 6 септември во рамки на 81. Венецијански филмски фестивал.

Настанот, организиран од Меѓународниот совет за кино и телевизија (CICT-ICFT) при УНЕСКО, имаше за цел да го истражи потенцијалот на мобилното кино како ново средство за културен дијалог, соработка и поттикнување на мир меѓу младите во медитеранскиот регион.

Ана Опачиќ, директорка на „Бич филм фестивал“, беше една од панелистите, заедно со истакнати личности од филмската индустрија и културни организации, кои споделија свои визии за иднината на киното и неговата улога во општествените промени.

На програмата на панелисти се најдоа и Магдалена Ландри, директорка на Регионалното биро за наука и култура на УНЕСКО во Европа; Алберто Барачини, државен потсекретар; Пиерпаоло Сапорито, претседател на Опсерваторија за дигитална комуникација (CICT ICFT) при УНЕСКО; Кујтим Чашку, режисер, Филмска и мултимедијална академија „Маруби“, Албанија; Алесандро Мандели основач на „Сериали“, Италија; Ор Сиголи од „Ерусалим филм фестивал“; Ахмед Беџауи, Интернационален филмски фестивал на Алжир; Ризван Ахмад од „Instructional Media Centre (MANUU) Индија; Ахмет Бојаџиоглу, „Festival on Wheels“ и претседател на „Ankara Cinema Association“ од Турција; Јасмина Бојиќ, „UNAFF Travelling Film Festival“, Универзитет „Стенфорд“ во САД; и други.

– Оваа покана претставува големо признание за нашето фестивалско движење и неговата улога во зајакнувањето на интеркултурниот дијалог преку филмската уметност, но и важноста на филмот како медиум – истакнува Ана Опачиќ, директорка на „Бич филм фестивал“.