Репрезентативецот на Девствените острови кои се под американска администрација, Дион Едвин (31 год, 191 см) ќе биде четвртото странско засилување за МЗТ Скопје во новата сезона, откако денеска официјално потпиша договор со македонскиот кошаркарски шампион.

Станува збор за искусен бек-шутер, кој европската кариера ја почна пред седум години во Финска каде што помина една сезона во тимот на КТП, по што следуваше успешен четиригодишен период минат во Украина. Таму, во два наврати, настапува на Химик, а по една сезона во Киев баскет и во Прометеј, а во 2022 година си замина со две шампионски титули (2019 и 2021) и едно МВП признание за најкорисен кошаркар во првенството (2019).

Едвин во 2022 година извесен период настапуваше за Работнички, по што се сели во Унгарија, каде што прво игра за Атомерому, а минатата сезона и за ДЕАК, каде што имаше просек од 13,3 поени, 5,3 скока и 5,3 асистенции.

Со ангажманот на Американецот од Девствените острови го МЗТ комплетираше ростерот од 12 кошаркари со кои ќе ја почне сезоната. Покрај него, улогата на странци ќе ја имаат уште Брандон Слај (САД), Марко Баковиќ (Хрватска) и Милош Копривица (БиХ), а ќе играат заедно со Дамјан и Војдан Стојановски, Бојан Крстевски, Андреј Магдевски, Андреј Маслинко, Марин Петков, Андреј Андоноски и Марко Миловановиќ.

Првиот настап МЗТ ќе го има против црногорскиот тим Теодо на 24 септември во СЦ „Јане Сандански“ – Скопје на стартот од АБА2-лигата.