Премиерот Димитар Ковачевски денеска го повика претседателот на собраниската Комисија за надворешна политика, Антонио Милошоски да свика седница на Комисијата на која директорот на АНБ, Виктор Димовски би требало да даде одговори за позитивното мислење за доделување македонски пасош на Украинецот Олександр Онишченко.

-Го повикувам претседателот на Комисијата за надворешни работи да свика Комисија каде што директорот на АНБ и предложен амбасадор да ги даде сите одговори на прашањата кои што ќе му бидат поставени, рече Ковачевски.

На денешната прес-конференција со албанскиот премиер Еди Рама, Ковачевски, одговарајќи на новинарски прашања, кажа дека Владата носи одлуки врз база на мислења од институции.

– При доделувањето на конкретното државјанство беа доставени сите позитивни мислења од сите институции кои што требало да дадат мислење и врз основа на тоа министрите се изјаснуваат, а со оглед дека сите документи биле со позитивни мислења од сите институции, донесено е и позитивно решение. Секој министер дури и претседател на Влада, не може да ги знае процедурите во секоја институција, а овде биле вклучени четири институции. Очекувам таков извештај да биде доставен до Владата за да можеме да видиме на кој начин биле изработени тие мислења, рече Ковачевски.