Заменик министерот за локална самоуправа Зоран Димитровски утрово ќе ја достави до премиерот Димитар Ковачевски оставката од функцијата откако Демократски сојуз вчера одлучи да не ја поддржи реконструкцијата на Владата и да го напушти парламентарното мнозинство.

„Сега ќе ја доставам оставката до премиерот Димитар Ковачевски. Не сакам да учествувам во Влада којашто има намера да води кампања за уставните промени со која ќе ги конфронтира партиите и граѓаните „за“ и „против“ Европа иако постои општ граѓански, политички и партиски консензус за членство на Македонија во ЕУ“, вели за „Слободен печат“ Димитровски.

Претседателот на ДС Павле Трајанов во изјава за „Слободен печат“ очекува и директорите на установите кои се од партијата, односно сите именувани или избрани функционери да си поднесат оставки, бидејќи тоа е партискиот став. Сепак, Трајанов вели дека повлекувањето на другите функционери ќе зависи и од СДСМ, од нив самите и од начинот на кој се поставени на функцијата.

Претседателството и Централниот совет на ДС вчера соопштија дека по сеопфатна расправа заклучија дека програмските приоритети на Демократскиот сојуз усогласени со СДСМ пред парламентарните избори во јули 2020 година, како и во декември 2021 година пред формирањето на Владата со актуелниот состав, не се имплементирани.